ТРОПАРЬ ВСЕМ СВЯТЫМ ВОИНАМ, ГЛ. 5

            Сонм воинов непобедимых,/ светоносен полк Царя Небеснаго/ воспоим вернии./ Прием бо вся оружия Божия/ и оболкшеся во броню правды,/ святии воини победиша славно полки враг невидимых,/ Церковь же Христову просветиша зарями тмочисленными./ Темже молим Христа Бога/ тех молитвами спасти души наша.

КОНДАК ВСЕМ СВЯТЫМ ВОИНАМ ГЛ. 2

Доблии воини Иисус Христовы,/ вернии други Божии!/ Не обязастеся куплями житейскими,/ Воеводе же Взбранному преславно угодили есте,/ душу свою положив за други своя./ Темже пред престолом Господа славы/ молите о еже спастися нам.

МОЛИТВА ВСЕМ СВЯТЫМ ВОИНАМ

О, всеблаженнии и доблии угодницы Божии, подвиги своими землю освятившии, храбрии во бранех врагов прогонителие и всем обидимым заступницы! Се ныне, пред святою иконою вашею, мы, грешнии, с любовию приносим вам хвалебное сие пение. Величаем ваши великия подвиги, духовнии воини Христа, служение бо ваше ангельскому подобно, ублажаем и ваше святое житие, прославляем и дивныя чудеса ваша, восхваляем вашу богоподражательную любовь, предстателие наши и покровителие.

            На помощь вашу уповающе, пред иконою со святыми ликами вашими покланяемся и молим: ей, святии воини Христовы, от лет древних просиявшии и в последния дни подвизавшиися, явленни и неявленни, ведомии и неведомии. Помяните немощь нашу и уничижение, и укрепите данною вам благодатию воинство православное. Разрушите силы возстающих на ны враг наших, видимых и невидимых, да постыдятся они и посрамятся, и дерзость их да сокрушится, да уведят и уразумеют, яко с нами Бог, по нам поборствуяй.

            О скорые наши помощницы и заступницы, укрепите молитвами вашими нашу слабую волю, во еже обрести нам мужество духовное и сокрушение о гресех наших. Умолите Господа Сил, да утвердит Церковь Свою непоколебиму в мире сем лукавом и многомятежном, да возродит в земле нашей дух разума и благочестия, дух святости и страха Божия, дух мира и братолюбия. Да знаменается на нас Свет Лица Божия и, тем наставляемы, да паки будем мы царское священие, род Божий святый, присно с вами славящий Отца и Сына и Святаго Духа во веки веков. Аминь.